Ginsulod sang mga nagpakilala nga miyembro sang New People’s Army ang balay ni Councilor Jolomar Hilario sang Moises Padilla, Negros Occidental, Domingo sang aga kag ginpatay ang opisyal sa iya nga kwarto.
Sa interview sang Bombo Radyo sa bayaw ni Hilario nga nagpakilala lamang kay Paps, hinali lang nagsulod sa ila compound ang indi magnubo 50 ka mga persona nga nagpakilala miyembro sang NPA kag nagasuksok sang camouflage nga uniporme sang militar, alas-6:00 sang aga.
Ginpangtayaan sang armas kag ginpahapa ang ila mga himata samtang nagapanghalungkay sa apat ka pamalay sa compound bangud nagapangita sila sang armas.
Ginkadtuan sang mga suspetsado ang balay ni Hilario kag ginsipa ang pwertahan sa kwarto tubtub nga ila nabuksan.
Didto na nabatian ang madamo nga linupok kag nagsinggit ang mga suspetsado nga “Mabuhay ang NPA”.
May isa pa ka lalaki nga nagsulod sa kwarto kag liwat nga nabatian ang lupok gani ginapatihan sang bayaw nga gin-finishing pa ang konsehal.
Gilayon nga nagbiya ang mga suspetsado sakay sa apat ka truck kag nagpadulong sa Barangay Quintin Remo.
Suno sa utod sang konsehal nga si Marilyn, nagpanago kuntani sa idalom sang kama ang opisyal apang ginbaliswa ini sang mga rebelde kag ginpaarakan sang luthang.
May pilas si Hilario sa liog, tiyan kag tata ang iya mga batiis panaog sa dapa-dapa.
Gindala pa ini sa malapit nga ospital apang gindeklarar nga patay.
Kaupod sang konsehal sa kwarto ang iya misis kag duha ka anak apang ginpagwa niya ini sang nahibaluan ang presensya sang mga rebelde antes gin-lock ang puertahan apang pilit nga ginbuksan sang mga suspetsado.
Wala gilayon nakasulod sa lugar ang rescue team sang Moises Padilla bangud ginbalabagan sang mga rebelde ang dalan.
Nagpatigayon man sang clearing operation ang militar bangud ginapahayag nga nagtanom sang landmine ang mga rebelde malapit sa balay ni Hilario.
