Ginahulat pa ni Moises Padilla Mayor Ella Garcia-Yulo ang sabat sang Office of the Ombudsman tuhoy sa ginapangayo sini nga paathag sa penalidad nga anom ka bulan nga wala sang sweldo.
Sa interview sang Bombo Radyo Bacolod sa alkalde, ginarespeto sini ang desisyon sang Ombudsman nga pagbasura sang iya Motion for Reconsideration.
Madumduman nga si Mayor Ella kag duha ka opisyal sang banwa ang ginpasakaan sang Administrative Case nga Grave Abuse of Authority kag Neglect of Duty bangod sa gina-alegar pagpugong kag pagdeny sa pagrenew sang business permit.
Suno sa alkalde, batun sini ang desisyon apang siya ang nagsulat sa Ombudsman agud mapaathagan tuhoy sa kaundan sang penalidad nga katumbas sang anom ka bulan sini nga sweldo.
Pahayag ni Yulo nga siya ang may mga mandatory dues nga nakabasi sa layi.
Kalakip diri ang bulanan nga balayra sa Income Tax, kontrobusyon sa Philippine Health Insurance Corporation (PhilHealth), Pagibig kag Government Service Insurance System (GSIS).
Dugang pa sini nga siya ang may GSIS Loan man kay may-ara sang loan agreement nga ini ang ibuhin sa sweldo kada bulan.
Gani, nagapati si Yulo nga indi nagakaigo nga ihatag sini tanan nga sweldo, bangod mabayolar naman ang iban nga mandatory payables.
Sa karun, ginahulat na lamang sini ang reply sang Office of the Ombudsman.
