Igaselebrar sa karun sang mga Filipino nga Muslim ang Eid’l Fitr — ukon ang Festival of Breaking the Fast, Abril 10.
Ini ang gin-anunsyar ni Bangsamoro Mufti Sheikh Abdulrauf Guialani kahapon matapos ginpatigayon ang moonsighting sa palibot sang designated areas sa pungsod.
Una na nga gindeklarar sang Malacanang ang Miyerkules, Abril 10 bilang holiday bangud sa pag-obserbar sang Eid’l Fitr.
Ang sighting sang mooncrescent ang tuman ka importante sa pagdeterminar sang Eid’l Fitr bangud ini ang nagamarka sang pagsugod sang bag-o nga lunar month sang Shawwal, ang ikanapulo nga bulan sa Islamic lunar calendar.
Ang Eid’l Fitr kag Ramadan ang nagalain-lain depende sa area bangud ang kada pungsod ang nagasunod sang independent moonsighting.
Ang Eid’l Fitr, nga masami ginaselebrar sa sulod sang tatlo ka adlaw, ang isa ka tion sang selebrasyon para sa mga Muslims sa bilog nga kalibutan.
Masami nga nagasugod ang selebrasyon sang mga Muslim paagi sa pagpangamuyo sa isa ka mosque kun kaagahon.
Ginamarkahana ini sang pagtililipon kaupod ang pamilya kag mga abyan lakip na ang pagshare sang pagkaon kag paghatag sang regalo.
Sa interview sang Bombo Radyo Bacolod kay Masjid Abu Bakkar Community President Muhammad Salman, sila ang may panimbahon nga gintalana para gid lamang sa pagtakop sang Ramadan nga may assembly time nga alas-6:00 sa aga.
May-ara man sila nga gamay nga salo-salo nga patigayunon sa Bacolod City Government Center, pahampang sa mga kabataan kag paghatag sang bulig sa mga tigulang.
Paathag sini nga ang Ramadan ang nakasentro sa pagtuo kay Allah, bangod ang selebrasyon ang nagikan sa tinaga nga Ramad ukon Burning, gani ginapakita man nila ang nagadabadaba nga pagtuo.
Suno diri, sa ginpatigayon nga isa ka bulan nga puasa, ang nangin kabudlayan amo ang epekto sang tuman ka init bangod sa El Niño.
Ini bangod sila ang indi pwede magkaon kag mag-inom sang tubig humalin sa pagbutlak sang adlaw tubtob nga ini ang magtunod.
Samtang sa ulihi nga napulo ka adlaw antes ang Eid al Fitr, sila ang nagabugtaw naman alas-2:00 sang kaagahon agud magpangamuyo.
