Gilayon man nga nadakpan ang priso sa Silay City Police Station matapos magpalagyo sang ginpaidalom sa medical checkup sa City Health Office.
Ang suspect ang ginkilala nga si Robine Dela Cruz, 19 anyos.
Sa interview sang Bombo Radyo Bacolod kay Police Lt Col Mark Anthony Darroca, hepe sang Silay City Police Station, tatlo ang ila nadakop sang Domingo sa ginkasa nga drug buybust operation.
Ang tatlo ang gindala sa Silay City Health Office kahapon para sa medical examination, apang si Dela Cruz ang nagpalagyo kapin alas-5:00 sang hapon.
Suno sa hepe, nagaproseso sang dokumento ang nagabantay nga pulis sang magpalagyo ang suspect.
Ginakatingala man ni Darroca kun paano nakapalos sa posas si Dela Cruz bangod ang kamot sini ang nakaposas sa kaupod.
Apang suno sa iya, menor de edad pa lamang si Dela Cruz ini ang pabalik-balik na sa children center sang ciudad bangod sa nanarisari nga bayolasyon kaangay sang pagpangawat.
Pahayag ni Darroca nga wala gid gin-untatan sang mga kapulisan ang pagpangita kay Dela Cruz tubtob nga siya ang nadakpan kapin alas-10:00 sang gab-i sa Elena Subdivision, Brgy 5, Silay City malapit lamang sa ospital kun diin sila ginpa-checkup.
Ang suspect ang ginpasakaan na sang kaso subong nga adlaw paagi sa inquest proceedings.
