May isa ka grupo nga ginalantaw ang Bacolod Police Station 2 sa pagluthang-patay sa 38 anyos nga babayi nga barker sa Purok Lubi, Barangay 3, Bacolod City, sang Biyernes.
Ang biktima ang ginkilala nga si Mary Jane Co, 38 anyos, barker kag temporaryo nga nagapuyo sa Brgy 5, Bacolod City.
Sa interview sang Bombo Radyo Bacolod kay Police Major Eugene Tolentino, station commander sang Bacolod Police Station 2, wala sang getaway vehicle ang nagluthang kay Co kag ini nagdalagan lang papalayo sa area kaupod ang isa pa gid nga ginapatihan amo ang watcher.
Suno kay Tolentino, wala sang tabon ang nawong sang suspek sang ginhimo sini ang krimen.
Sa karun may mga motibo na nga ginalantaw ang kapulisan kag isa diri amo nga nasal-an nga asset sang kapulisan si Co.
Ini bangod makaagi nga may ginpatigayon nga buy bust operation ang kapulisan kag amo man nga nakit-an nga nanaog sa itom nga toyota innova si Co.
Siya ang mahimo ginpasinbangdan nga asset nga amo ang nanugid sa kapulisan.
Sa karun apisar sa kakulba nga mabalikan, wala untat nga nagakoordinar ang pamilya sang biktima sa mga kapulisan.
Pahayag ni Tolentino, ila gina-monitor ang pamilya agud sa safety man nila.
