Ginkumpirmar ni Bacolod City administrator Em Ang nga duha nalang sa 531 ka mga nagpositibo sa COVID-19 sa ginpatigayon nga mass testing nagligad nga Agosto 27 tubtob 29 ang wala makontak tubtob sa karon.
Sa interview sang Bombo Radyo Bacolod kay Ang, ginpahayag sini nga nabudlayan ang contact tracing team nga magpangita sa mga nagpositibo bangud nga lain-lain nga data ang ila ginbutang sa contact tracing form antes sila nagpaidalom sa swab testing.
Suno sa city administrator, pila sa mga nagpositibo sa mass testing sa Bacolod ang nagbutang sang ila address nga out-of-town apisar pa nga diri sila nagapuyo sa ciudad.
Suno kay Ang, kun husto nga impormasyon lang kuntani ang ila ginhatag, mahapos lang ang pagpangita sa ila.
Nahibaluan nga ang contact tracing team para sa isa ka pasyente ang nalakipan sang isa ka taga-City Health Office kag isa ka police personnel.
Pananglitan nga mabudlayan nga ma-contact trace, nagapangayo ang mga ini sang bulig sa Criminal Investigation and Detection Group (CIDG), National Bureau of Investigation (NBI), kag sa Department of the Interior and Local Government (DILG).
Nagapangabay si Ang sa mga naga-positibo sa coronavirus nga kuntani indi na magpanago bangud nga mas ginabutang sang mga ini sa risgo ang kabuhi sang mga tawo sa ila palibot ilabi na ang ila nga pamilya.
