Ginahulat pa ang resulta sang paraffin test sa duha ka mga napatay sa accidental firing sa ciudad sang Victorias kag duha pa nila ka mga abyan agud matumod kun sin-o gid man ang nakapalupok sang pusil.
Sa interview sang Bombo Radyo Bacolod kay P/Lt. Col. Mary Rose Pico, hepe sang Victorias City Police Station, ginkuhaan nila sang pahayag ang mga nakasaksi nga sanday Kelvin John Pedrajas kag Florence John Tianga nahanungod sa kamatayon nanday Patrolman Jonel Lutao, 26-anyos sang Batus Brillantes, Brgy. 1 kag James Carl Hernal, 26 anyos sang Estrella Village, Brgy. 6 sang nasambit nga ciudad.
Suno kay Pico, makabig nga mga witnesses sanday Pedrajas kag Tianga apang posible man sila mangin persons of interest gani kinahanglan sila ipaidalom sa paraffin test.
Nahibaluan nga gindaho ni Hernal ang pusil kay Lutao kag aksidente lamang ini nga naglupok.
Gilayon naman nga nagwa si Lutao kag gintiro ang iya kaugalingon.
Nakaangkon sang igo sa ulo si Hernal samtang sa baba naman ang igo ni Lutao.
Sa karon, padayon pa ang imbestigasyon sa insidente agud mahibaluan ang matuod nga natabo.
