Nakuha liwat sang National Capital Region ang kampeonato sa nagtakop nga Palarong Pambansa 2024 nga ginpatigayon sa ciudad sang Cebu.
Nangin dinapit nga bisita si Vice President Sara Duterte.
Sa speech ni VP Sara, ginpasalamatan sini ang tanan nga local government units nga nagsuporta sa mga programa sang Department of Education ilabi sa Palarong Pambansa 2024.
Ginpanginbulahan man sang bise presidente ang mga disiplinado nga mga atleta.
Ginpasalamatan man sini ang mga ginikanan kag mga coaches sang mga atleta nga naghampang sa Palarong Pambansa 2024.
Panugyan sang bise presidente nga padayon nga magpakabakod sa paghimo sang mga bagay nga para sa Diyos, sa pungsod kag sa pamilya.
Samtang, ang magahost naman sang 2025 Palarong Pambansa amo ang Ilocos Norte.
Ginbaton kag nagpasalamat naman si Ilocos Norte Governor Matthew Marcos Manotoc sa pagpili sa ila nga probinsya nga maghost sa nasambit nga national sports event.
Para sa over-all final medal tally, nakatipon ang NCR sang 238 nga medalya sa tanan nga ginpasakupan nga events kag 98 diri ang gold; 66 ang silver samtang 74 naman ang bronze medal.
Nagpangaduha ang Region IV-A ukon Calabarzon nga may kabug-usan nga 161 medals, 57 diri ang gold; 41 ka silver kag 53 nga bronze medal.
Nagapangatlo ang Region VI ukon ang Western Visayas nga may kabug-usan nga 138 ka medalya nga ginalakipan sang 56 ka gold, 41 ka silver kag 41 nga bronze medal.
Nagapang-apat ang Davao Region kag pang-lima ang host region nga Central Visayas.
Sa Elementary Division, nagapanguna sa gihapon ang National Capital Region nga 77 ka medalya, 34 diri ang gold; 18 silver kag 25 ang bronze; nagapaduha ang Region VI ukon ang Western Visayas nga may kabug-usan 55 ka medalya; nga ginalakipan sang 28 ka gold; 16 ka silver kag 11 ka bronze.
Samtang nagapangatlo ang Region IV-A nga may kabug-usan 59 ka medalya; 20 ang gold; 19 ang silver kag 20 ang bronze.
Nagasunod ang Region III ukon ang Central Luzon kag Region X ukon ang Northern Mindanao.
Sa Secondary Division, nagapanguna ang National Capital Region ang may natipon nga 161 ka medalya, 64 ang gold; 48 silver kag 49 ang bronze, nagapangaduha ang Region IV-A nga may kabug-usan nga 102 ka medalya, 37 ang gold; 32 ang silver; kag 33 ang bronze samtang nagapangatlo ang Region VI ukon ang Western Visayas nga may kabug-usan nga 83 ka medalya; 28 ang gold; 25 ang silver kag 30 ang bronze.
Samtang nagpang-apat ang Region XI ukon ang Davao Region; kag panglima ang Region VII ukon ang Central Visayas.
Samtang sa Para Games; nagapanguna ang Western Visayas nga kabug-usan nga 59 ka medalya; 24 diri ang gold; 21 ang silver kag 14 ang bronze.
Nagapangaduha ang Region IV-A ukon ang Calabarzon nga may kabug-usan nga 31 ka medalya, 13 ang gold; siyam ang silver kag siyam man ang Bronze.
Nagapangatlo ang National Capital Region nga may 22 ka medalya; siyam ang gold; walo ang silver kag lima ang bronze, nagapang-apat ang Region IX ukon ang Zamboanga Peninsula; kag nagapanglima ang Region XI ang Davao Region.
