Aminado ang Chairman sa National Transport Group nga MANIBELA nga indi mahangpan ang mandato sang Land Transportation Franchising and Regulatory Board (LTFRB) kag Land Transportation Office (LTO).
Sa interview sang Bombo Radyo Bacolod kay MANIBELA Chairman Mar Valbuena, maathag nga naghatag sang 15 ka adlaw nga extention ang LTFRB sa indi pagpanakop sang mga unconsolidated jeepneys matapos ang Abril 30 nga consolidation deadline.
Apang sa pihak sini mahimo naman nga magpanakop ang LTO.
Panindugan ni Valbuena nga dapat ini ang mapa-athag, bangod ang magkatuhay nga pagpatuman ang nagapakita lamang sang maathag nga kakulangan sa preparasyon sang gobyerno.
Suno diri, dako nga butang ang paghugpong sang mga traditional jeepney drivers and operators, apisar nga sila ang wala ginapabyahe.
Ginalantaw sini nga sila ang kaangay nga mas preparado pa sangsa palpak nga programa sang gobyerno.
Ang dugay-dugay nga extension ang pamatuod na nga kulang sang preparasyon ang gobyerno, kag sila ang ginabully lamang.
Panindugan ni Valbuena nga kun sila ang dagdagan sang show cause order, parehas lamang ang ila nga isabat sa madugay na nila nga ginasinggitan.
Panindugan sini nga nagapaantos lamang ang public utility vehicle (PUV) modernization program.
Apisar sa madinalag-on nga untat-byahe, wala man sila nalipay nga madamo sang commuters nga nastranded.
Apang paathag sini nga luyag nila nga matalupangdan kag pamatian ang ila nga mga hingyo.
Pabor man ini kun palawigon pa ang ila pagbyahe tubtob sa Disyembre, apang ang kinahanglan nila amo ang seryoso nga dialogo.
Pahanumdom sini nga magadangat sa 900,000 ka pamilya ang apektado sa pagkadula sang mga traditional public utility vehicles.
