BACOLOD CITY — Indi pa mapatuman sang ciudad sang Bacolod ang smoking ban nga mangin epektibo na bwas nga adlaw, Hulyo 23, kasunod sang Executive Order ni Presidente Rodrigo Duterte tuhoy sa nationwide nga pagdumili sang pagpanigarilyo sa pampubliko nga mga lugar.
Suno kay Bacolod City Councilor Em Ang, chairman sang Committee on Health sa Sangguniang Panlungsod, wala sang tawo ang City Health Office nga amo ang magapatuman sini kag wala pa man naconvene ang task force nga magatutok diri.
Ini ang nahisayran kadungan sang pagpakigsapol sang konsehal sa City Health Office sang nagligad nga adlaw.
Suno kay City Councilor Ceasar Distrito nga amo ang author sang Anti-Smoking Ordinance sang Bacolod, dapat nga i-activate na sang city government ang Task Force nga magapatuman sini bangud EO sang presidente ang nagamandu sini kag daw kaangay nga nadula na ang city ordinance.
Ang amo nga task force ang bug-usan sang tanan nga enforcement agencies nga amo ang magapangdakop sa mga maaktuhan nga nagalapas diri.
Ginpasalig naman ni Bacolod City Police Office director Police Senior Supt. Jack Wanky nga handa na ang mga kapulisan sa pagpatuman sang amo nga pagsulundan.
Suno diri, indi naman kinahanglan ang task force gid kundi iya lamang manduan ang tanan nga mga police stations nga dakpon ang mga nagapanigarilyo sa pampubliko nga mga lugar.
