BACOLOD CITY — Nag-atubang si Provincial Veterinarian Renante Decena sa mga katapo sang Sangguniang Panlalawigan agud ipresentar ang mga tikang nga ginapatigayon sang probinsiya agud indi makasulod ang bird flu diri.
Sa ginpatigayon nga session kahapon, ginpatpat ni Decena ang mga tikang sang Provincial Veterinary Office agud masiguro nga indi makasulod sa Negros Occidental ang kagaw nga nagpatay sang madamo nga manok kag pispis sa Luzon.
Suno kay Dr. Decena, ginbatak na ang mandu nga nagadumili sa pagpasulod sang poultry products gikan sa Luzon padulong sa Visayas kag Mindanao apang sa pihak sini, padayon nga nangin maid-id sila sa pagpasulod sang karne kag itlog sang manok ukon pispis agud indi makakontaminar sa mga kasapatan diri.
Nahibaluan nga ang mga grupo sang mga nagasagod sang manok-inugbulang sa probinsiya ang nagdangop sa provincial board agud hingyuon nga palawigon pa sang isa ka bulan ang ban sa poultry products agud indi mahalitan ang gamefowl industry diri.
Sa sini, suno kay Dr. Decena, ginrekomendar sini sa SP ang pagdihon sang resolusyon nga ipadala kay Agriculture Sec. Manny Piñol nga nagahingyo nga palawigon pa sang isa ka bulan ang banning sa Negros Occidental agud maamligan ang industriya sang manok-inugbulang sa diin kilala ang probinsiya.
