Ginkumpirmar sang Philippine Embassy sa Israel nga nagtaliwan na ang isa ka 49 anyos nga Filipina caregiver nagikan sa Negros Occidental matapos nga makaangkon sang patal nga pilas bangud sa air strike sang Iran sang June 15.
Ang nagtaliwan nga Filipina caregiver ang ginkilala kay Leah Mosquera.
Sa interview sang Bombo Radyo Bacolod kay Geraldine Gonzaga, Bombo International News Correspondent direkta sa Israel, ginakasubo nila nga may napatay nga Filipina caregiver kag ini ang residente pa sang San Enrique, Negros Occidental bangud sa missile attack sang Iran sa Israel.
Gin-anunsyar kahapon sang Philippine Embassy sa Israel nga ang napatay ang ginkilala kay Leah Mosquera, 49 anyos kag nagikan sa Negros Occidental.
Suno kay Gonzaga, ang building nga ginaestaran ni Mosquera ang isa sa mga nawasak matapos nga maigo sang missiles nagikan sa Iran.
Suno diri, bisan may yara sang bombshelter ukon ginatawag nga Mamad sa Hebrew indi sagihapon safe bangud mawasak man ini bisan mabakod kun ang building mismo ang maguba bangud sa pagpang-atake.
Apisar sang mga natabo wala man sang plano nga magpauli si Gonzaga bangud dako ang pagsalig sini sa ikasarang sang Iron Dome sang Israel.
Santo sa post sang Philippine Embassy sa Israel si Mosquera ang gindala sa Shamir Medical Center kun sa diin ini ang ginpaidalom sa pila mga surgeries kag nagpabilin sa Intensive Care Unit sa sulod sang pila ka semana.
Siya ang gin-atipan man sang iya utod nga si Joy nga nagatrabaho man sa nasambit nga pungsod.
Si Joy man mismo ang naghatag sang impormasyon nga nagtaliwan ang iya utod kag nagpahanugot man nga ipahibalo sa publiko ang nasambit nga impormasyon.
Nagpadangat man sang pagpakig-unong ang embahada sa nalisdan nga pamilya.
