BACOLOD CITY — Natalana nga hatagan sang probinsiya sang Negros Occidental sang pagkilala ang mga suldado nga gikan diri kag ginpadala sa Marawi City.
Suno kay Governor Alfredo Marañon Jr., sa madason nga semana posible maga-abot ang mga suldado nga miembro sang 303rd Infantry Brigade (IB) sang Philippine Army kadungan sang pagtapos na sang combat operations sa Marawi.
Magluwas sa ila suno kay Marañon, hatagan man pagkilala ang apat ka mga suldado nga napatay sa Marawi kag indi mga miembro sang 303rd IB.
Ini ang ginalakipan nanday Corporal Arjilito Baroa sang Brgy. 3, San Carlos City kag miembro sang Scout Ranger kag napatay sang Agosto 3; Corporal Ariel Silas Arquio sang 63rd IB nga taga Brgy. Inayawan banwa sang Cauyan kag napatay sang Agosto 1.
Subong man sanday Staff Sergeant Joseph Villanueva sang 15th IB sang banwa sang La Castellana kag napatay sang May 31 kag PFC Ramonito Occeño III sang Scout Ranger kag taga ciudad sang Sipalay kag napatay sa bakbakan sang Hulyo 5.
