Dako ang kalipay sang Negros Occidental Men’s Volleyball Team Secondary level matapos magchampion sa Western Visayas Regional Athletics Association (WVRAA) Meet 2024.
Ang mga atleta nga nagikan sa Living Stone International School sa Barangay Villamonte, Bacolod City amo ang magarepresentar sang Western Visayas sa Palarong Pambansa 2024.
Sa 1st set una nga nakadaog ang Negros Occidental, apang nakuha naman sang Aklan ang 2nd set.
Ang 3rd kag 4th set naman ang ginseguro na sang Negros Occidental, gani nakuha nila ang championship.
Sa interview sang Bombo Radyo Bacolod kay Coach Ralph Savellano, worth it ang ila nga ginbuhos nga sakripisyo kun sa diin ang oras nga para sa pamilya kag pag-eskwela, ang ila gintutok sa training.
Panindugan sang coach nga nakuha sang mga kabataan ang championship indi bangod sa iya kundi bangod sa paghimo sang mga ini sang ila nga mga role sa hampang kasubong man sa pag-ubay sang Ginoo.
Dugang pa ni Savellano nga antes paman maghampang, nakatatak na sa ila ang mindset nga dapat mangin all out sa hampang.
Aminado ini nga may-ara sang kakulba kag ginakulang ang ila nga oras sa training bangod bag-o lamang natapos ang provincial meet sa Negros Occidental, apang bangod sa x3 nga training kag sakripisyo sang kabataan, ila nakuha ang Championship batok sa Aklan.
Samtang ginpahayag naman sang coach sa Aklan nga kuhaon nila ang gold sa masunod nga Regional Meet.
Sa interview sang Bombo Radyo Bacolod kay Coach Archie Ileto, sang Aklan Men’s Volleyball Team Secondary, ginalauman nila ang kadalag-an apang aminado ini nga bilog ang bola.
Suno diri, sila ang bronze medal sa WVRAA 2023 samtang silver medal naman sa karun.
Ginpasalig sini nga sila ang magabalik nga mas mabaskog kag kuhaon ang gold medal sa masunod nga Regional competition.
Aminado ini nga iban sa ila players ang magradwar na subong nga tuig, apang pasalig sini nga sila ang may mga reserba na nga mga players para sa masunod nga tuig.
