BACOLOD CITY – Nagmadinalag-on ang Negros Occidental Philippines Team nga amo ang nagtiglawas sang Pilipinas sa Asia Pacific Softball Tournament sa pungsod Singapore.
Ginkamasaan sang Little League, kun sa diin ang mga players ang nagaedad sang 11 tubtob 12, kag subong man sang Senior League, kun sa diin ang mga players ang nagaedad naman sang 14 tubtob 16, ang ila mga kasumpong sa championship match kaina sang aga.
Sa impormasyon nga ginpalab-ot sa Bombo Radyo ni Little League Coach Lizviminda Jalandoni, nakabalhag sila sang 15-0 score sa championship match kontra sa Singapore.
Samtang nangin 10-0 naman ang score sang Pilipinas sa Senior League kun sa diin ila nangin kontra ang pungsod India.
Ang kampyonato nakuha sang Pilipinas paagi sa Negrense players makaligad ang anom katuig nga wala nagpasakop ang Negros Occidental sa Philippine Series tubtob nga liwat ini nagsabak sa amo nga torneyo kag nakuha ang kadalag-an.
Bangud sang pagdaog sa Asia Pacific Softball Tournament, ang Pilipinas na ang magatiglawas sang Asia Pacific Region sa Little League Senior Softball World Series sa Amerika.
Ang team ni Jalandoni ang magasambuwa sa Little League sa Portland, Oregon sa Agusto 12 samtang ang Senior League, nga ginapangunahan sang ila coach nga si Tony Oquindo, ang magasabak naman sa hinampang sa Delaware sa Agusto 6.
