Sa Lunes na istoryahan sang mga opisyales sang provincial government sang Negros Occidental kag sang National Food Authority kun paano makabulig sa mga mangunguma subong nga nagnubo ang presyo sang humay.
Sa interview sang Bombo Radyo Bacolod kay Governor Bong Lacson, istoryahan sa pagsinapol kun ano ang intervention nga himuon sang provincial government kag sa diin makuha sang pondo nga ibakal sang humay nagikan sa mga mangunguma.
Ini ang kasunod sang panawagan sang Department of Agriculture sa mga probinsya nga magpain sang pondo nga ibakal sang humay agud mabuligan ang mga nagaproduce sang humay.
Suno kay Lacson, magaupod sa pagsinapol ang provincial budget officer agud matumod kun pila ang available nga pondo kag kun kulang, matumod kun ano ang posible nga mangin source sang budget.
Aminado ang gobernador nga indi niya kuntani luyag nga mangutang liwat sang pondo apang kun ini ang paagi agud nga may ibakal sang humay bangud nakahanda man ang LandBank of the Philippines nga magpahulam sang kwarta.
Suno kay Lacson, ironic bangud kun natuman man ang tinutuyo sang Rice Tariffication Law nga panubuon ang presyo sang bugas sa merkado, mga mangunguma naman ang apektado, gani magahimo sang paagi ang provincial government agud nga makabulig.
Bukas si Lacson nga sundon ang sistema sang provincial government sang Isabela kag sang National Food Authority sa pagbakal sang humay nagikan sa local rice farmers.
Ginpahayag sini nga ginadugangan sang provincial government sang Isabela ang buying price sang NFA agud nga mas mahal ang ila pamakal kun ipaanggid sa commercial traders.
Isa sa mga options suno kay Lacson amo nga mabakal ang provincial government kag ang NFA, ipagaling, kag ibaligya sa mga konsumidor bisan diutay lamang ang mangin ginansya diri.
Ang importante suno sa gobernador amo nga indi lang mamierdihan sa kapital bangud kabahin man ini sang economic enterprise.
Mahimo man nga baligyaan ang Department of Social Welfare and Development bangud nagakinahanglan man sila sang bugas sa tiempo sang kalamidad.
Nagpanawagan man ini sa mga mangunguma nga indi magbatyag sang katalaw bangud magasapol ang mga opisyales agud istoryahan kun paano sila mabuligan.
