Ginapangitaan pa sa karun sang Negros Occidental Provincial Government kun sa diin kuhaon ang pondo para isubsidize sa bugas agud nga mabaligya sa P20 kada kilo.
Nahibaluan nga una ipatuman sa Visayas ang pagbaligya sang P20 kada kilo sang bugas santo sa gin-anunsyar sang Department of Agriculture.
Suno kay Negros Occidental Governor Eugenio Jose “Bong” Lacson, sa Lunes pagatalakayon ni Agriculture Secretary Francisco Tiu Laurel Jr., sa mga regional directors sang Visayas ang mechanics sa pagbaligya sang P20 nga kilo sang bugas.
Ang amo nga tikang ang gintalakay ni President Ferdinand “Bongbong” Marcos Jr., sang Miyerkules sa mga gobernador sa Visayas sa meeting nga ginpatigayon sa Cebu.
Sa iya inisyal nga pagsugilanon kay NIR DA Regional Director Jose Alberto Barogo, tag P33 ang bili sang kilo sang bugas nga igabaligya.
Gani ang P13 nga diperensya sa selling price nga P20 ang igasubsidize sang gobyerno probinsyal kag national government.
Ginpasalig man ni Barrogo nga ang bugas ang freshly milled kag ini ang indi na maglapaw pa sa tatlo ka bulan.
Apang indi tanan nga pumuluyo ang makabakal sang P20 nga kilo sang bugas.
Ginalantaw nga napulo ka kilo ang mahimo mabakal sang tagsa ka pamilya kada semana ukon 40 kilos kada bulan.
Sa barangay man direkta ibaligya ang nasambit nga bugas agud nga wala na sang patong kag masiguro nga mabakal sa P20 kada kilo nga presyo.
Nahibaluan nga 693,300 ka sako sang bugas ang makunsumo sa probinsya sang Negros Occidental kada bulan.
