Magluwas sa paghatag sang cash incentives, luyag man ni Negros Occidental Governor Eugenio Jose “Bong” Lacson nga mahatagan sang mas malawig nga oras sa training ang mga players sang Negros Occidental nga magahampang sa Palarong Pambansa 2024 sa Hulyo.
Sa interview sang Bombo Radyo Bacolod kay Ian Arnold Arnaez, public information officer sang Department of Education (DepEd) division of Negros Occidental, ang provincial government ang naghatag sang balor P1.5 million nga cash incentives sa mga medalist sa pahampang, kun sa diin P1,500 ang nabatun sang mga gold medalist, P1,000 sa silver medalist kag P700 sa bronze medalist.
Paathag ni Arnaez nga sa team sports, kada isa sa mga miyembro ang makabatun sang cash incentives.
Ginpanugyan man ni Governor Lacson nga mas maayo kun imbes 30 ka adlaw lamang ang training sang mga magahampang sa Palarong Pambansa 2024, ini ang palawigon sang 45 ka adlaw.
Pasalig sini nga bukas ang Panaad Park and Stadium agud magamit sang mga atleta sa training.
Segurado naman ang paghampang sang mga gold medalist magluwas lamang sa mga individual sports nga may standard requirements kaangay sa athletics kag swimming.
Suno kay Arnaez, magluwas sa mga makapasar sa standard santo sa ila records sa Western Visayas Regional Athletics Association (WVRAA) Meet 2024, kinahanglan man ang mga ini nga makasulod sa Top 24 Nationwide agud makahampang sa Palarong Pambansa 2024.
Mensahe ni Arnaez sa mga atleta nga magpadayun lamang sa training kag maglaom nga sa ulihi ang ila nga mga pagpanikasog ang magabunga.
