BACOLOD CITY – Gin-akusaran ni Negros Oriental Governor Roel Degamo ang Office of the Ombudsman nga bias sa pag-uyat sang graft case nga iya ginaatubang may kaangtanan sa sala nga paggamit sang calamity funds.
Ini ang pahayag ni Degamo matapos nga nakakuha siya sang temporary restraining order (TRO) batok sa ikaduha nga kaso nga iya ginaatubang may kaangtanan sa paggamit sa 480 milyones pesos nga calamity funds sang tuig 2011 kag 2012.
Ginserbehan na sang una sang dismissal from service si Degamo ugaling nakakuha ini sang temporary restraining order sa Court of Appeals matapos nga nare-elect bilang gobernador.
Suno kay Degamo, pareho man nga kaso ang gin-file sa iya ugaling lain lang nga tawo ang complainant.
Kuntani suno sa iya, i-dismiss sang Ombudsman ang kaso bangud gingamit man gani sang CA ang Aguinaldo doctrine sa pag-issue sang TRO.
Ang kaso ni Degamo nag-ugat sa financial assistance para sa rehabilitasyon sang mga structures nga ginguba ni bagyo Sendong sang tuig 2011 kag magnitude 6.9 nga linog sang tuig 2012.
Nag-issue sang special allotment release order (SARO) ang Department of Budget and Management ugaling ginbawi ini bangud wala sang compliance ang provincial government.
Bisan may negative SARO, ginpadayon ni degamo ang pag-award sang kontrata gani nadutlan ini sa kaso.
