Sigurado na ang bronze medal para kay Nesthy Petecio matapos nga nalutos si Zichin Xu sang China sa quarterfinals sang women’s 57kg class sa 2024 Paris Olympics sa North Paris Arena.
Isa na lamang ka game ang kinahanglan sini nga madag-an agud makaangkon sang tiyansa nga mamatch ukon malapawan ang iya silver medal nga nadag-an sa Tokyo Olympics kun sa diin ini nagdebut tatlo ka tuig na ang nakaligad.
Sa interview sang Bombo Radyo kay Coach Reynaldo Galido, head coach sang Philippine Women’s Boxing Team sa Paris Olympics, si Petecio na lamang kag si Aira Villegas ang nabilin sa boxing team nga nagapadayon sa pagcompete kag lunsay ang mga ini padulong na sa semi-finals.
Si Villegas ang magaatubang kay Buse Naz Cakiroglu sang Turkey sa Agosto 6, oras sa France, samtang si Petecio naman ang magahampang batok kay Julia Szeremeta sang Poland sa Agosto 7.
Suno sa iya, subong nga adlaw sila magadihon sang game plan kag may mga stratehiya na agud makuha ang kadalag-an.
Ginapabilin naman sang 32-anyos nga Olympian ang mindset nga “one step at a time” sa iya journey sa karun sa Paris Olympics.
Sa interview sang Bombo Radyo kay Nesthy Petecio, pagkatapos sang iya nga hampang kagab-i, nagpahuway ini anay bangud subong nga adlaw, sila ang magapreparar naman para sa semi-finals.
Iya ginahalad ang iya kadalag-an sa iya pamilya, sa iya fiance nga tumandok sang Sipalay City, sa pungsod Pilipinas kag sa Ginoo.
Nagapasalamat ini sa tanan nga nagasuporta sa ila mga atleta nga yara sa karun sa Paris Olympics kag nagpangayo sang pagpangamuyo para sa ila nabilin nga mga hampang.
Ginadayaw naman sang Presidente sang Samahang Weightlifting ng Pilipinas ang sanday Carlos Yulo, Aira Villegas kag Nesthy Petecio nga nakasecure na sang mga medalya para sa pungsod.
Suno kay former Bacolod Mayor kag Congressman Monico Puentevella, apisar sang ila mga kadalag-an, nagapabilin nga humble sanday Yulo nga nakahimo sang maragtas matapos makauha sang duha ka gold sa gymnastics kag Villegas kag Petecio nga nakasecure na sang bronze medals.
Nagapanawagan ini sang padayon nga pagsuporta sang mga pumuluyo kag sang gobyerno sa mga atleta nga nagadala sa karun sang hayahay sang Pilipinas sa 2024 Paris Olympics.
