BACOLOD CITY — Nagpwesto ang Negros Island Region sa ikaapat nga posisyon sa Palarong Pambansa 2017 nga opisyal na nga nagtakop sa probinsya sang Antique subong nga adlaw.
Sa sulod sang lima ka adlaw nga hinampang nga nagsugod sang Lunes, ang NIR ang nakatipon sang 26 ka bulawan, 27 ka silver kag 36 ka bronze medals.
Nagsaka ang ranking sini kun ikumparar sang tinalikdan nga Palarong Pambansa kun sa diin gindeklarar nga 6th placer ang NIR matapos nga nakatipon sang 21 ka bulawan nga medalya.
Sa gihapon, nadepensahan sang National Capital Region ang kampeonato matapos nga nakakuha sang 98 ka bulawan, 66 ka silver kag 45 ka bronze medals.
Gindeklarar nga 1st runner-up ang Region IV-A nga may 42 ka bulawan, 57 ka silver kag 57 ka bronze medals; 2nd runner-up ang Region 6 nga may 38 ka bulawan, 29 ka silver kag 40 ka bronze; samtang nagapanglima ang Region XII nga may 26 ka bulawan, 22 ka silver kag 35 ka bronze medals.
Ang Palarong Pambansa ang pormal nga nagtakop pasado las 4:00 kaina sang hapon kun sa diin nangin dinapit nga bisita si Senador Franklin Drilon.
