May ara sang apat ka registered guidance counselor sa Negros Occidental High School apang aminado ang principal nga ini ang kulang kun basihan ang student population.
Sa interview sang Bombo Radyo Bacolod kay Dr. Cheryl Tondo, Principal IV sang Negros Occidental High School, apisar nga adlaw-adlaw ginapahanumdom sa flag ceremony nga indi manakit paagi sa tinaga, pisikal, kag sa online.
Apang aminado ang principal nga may ara gid kun kaisa nga nagakatabo nga bullying.
Panugyan sini sa mga kabataan nga makaeksperyensya sang bullying nga magpanugid sa mga manunudlo, kag kun nahuya ukon nakulbaan, mahimo man nga magbilin sang sulat sa table sang manunudlo.
Suno diri, may apat ka registered guidance counselor ukon tag-isa sa kada grade level sa NOHS, kag may separado man nga guidance counselor para sa Senior High School.
Pahayag sini nga sadto mga manunudlo ang ginadesignate nga guidance counselor apang sumugod sang 2009, required na nga registered guidance counselor ang ibutang kag sila ang wala sang load nga subject.
Apang suno diri kun basihan ang national standard, dapat nga may isa ka guidance counselor sa kada 500 ka estudyante.
Suno kay Tondo, may-ara sang kapin 1,500 ka mga estudyante sa kada Grade level sang NOHS gani kulang ang apat lamang ka guidancecounselor.
Sa pihak sini, pahanumdom ni Tondo nga ini ang indi masarangan sang manunudlo kag guidance counselor lamang, kundi kinahanglan gid ang kooperasyon sang ginikanan.
Panugyan sini sa mga ginikanan nga pamangkuton man ang mga kabataan kun may problema, kag kun sin-o ang ila nga gina-updan.
