BACOLOD CITY — Ang approval nalang sang Sangguniang Panlalawigan sang Negros Occidental ang ginahulat agud nga mapasa na sa Negros Occidental High School ang duha ka mga salakyan sang provincial government agud nga gamiton sang mga estudyante sang Senior High School.
Suno kay NOHS Principal Mario Amaca, ang duha ka mga salakyan nga ginalakipan sang Samurai kag pick-up ang gamiton sang mga estudyante nga nagakuha sang automotive course.
Sa pagpakigsapol sini kay Governor Alfredo Marañon Jr., nag-commit na ang opisyal nga igahatag ini sa NOHS apang kinahanglan pa ang approval sang Konseho.
Magluwas diri, isa man sa ginahitso sa karun amo ang pagtransfer sang mga kagamitan sa Paglaum Complex nga gingamit bilang mga classrooms samtang wala pa natapos ang bag-o nga senior high school building.
Suno kay Amaca, may 40 ka classrooms nga natalana nga tapuson sang DPWH agud nga magamit na sang NOHS.
Ang amo nga eskwelahan ang may total population nga 7, 000 nga ginalakipan sang 5, 000 ka junior high school, 1300 ka senior high school kag 500 ka night class.
Ginpasalig naman ni Amaca nga indi na masulit ang paggamit nila sang shed houses sa NOHS bilang hulot-klasehan.
