Aminado ang National Union of Journalists of the Philippines (NUJP) – Bacolod Chapter nga pinasahi ang subong nga anibersaryo sang Maguindanao massacre.
Sa interview sang Bombo Radyo kay Marchel Espina, chairperson sang NUJP – Bacolod Chapter, ginpahayag sini nga pinasahi ang subong nga anibersaryo sang Maguindanao massacre bangud ini ang ika-napulo nga pagsukat kag sini man nga tuig mahibaluan ang desisyon sang korte sa 101 ka mga suspetsado sa nasambit nga massacre.
Suno kay Espina, nagaupod sila sa pamilya sang mga biktima sa pagtawag sang hustisya kag nagalaom ini nga ma-convict ang mga suspetsado.
Nahibaluan nga nag-upod man ang National Union of Journalists of the Philippines (NUJP) – Bacolod chapter sa pagdumdum sa ikanapulo nga anibersaryo sang Maguindanao massacre kahapon.
May yara sang gamay nga tribute sa opisina sang Negros Press Club paagi sa pagpakita sang mga video clips sang natabo pulo ka tuig na ang nakaligad kag may yara man sang candle lighting nga ginhiwat.
Tinutuyo sini ang pagpanawagan sang hustisya sang mga biktima sang ginkabig nga worst election related violence sa recent Philippine History kag pinakamalala nga pag-atake sa mga journalists.
Madumduman nga ang maka-silidni nga krimen ang natabo sadtong Nobyembre 23 tuig 2009 kun sa diin may yara 58 ka mga persona ang ginpatay.
32 sa mga ini ang mga journalists kalakip na ang Chief of reporters sang Bombo Radyo Koronadal nga si anay Bombo Bart Maravilla.
Nagalaom man ang utod sang isa sa mga biktima nga si Atty. Concepcion “Connie” Brizuela nga mangin pabor sa ila ang mangin desisyon sa korte.
Sa interview sang Bombo Radyo kay Andrea Jaime, ginpahayag sini nga ginarespeto niya ang isa ka bulan nga extension nga ginpangayo sang korte apang nagalaom ini nga may yara sang conviction nga matabo kag mangin positibo ang resulta sang kaso nga pulo na ka tuig nga ginadesisyunan.
Aminado si Jaime nga may yara sila sang nabaton nga mga pagpamahog agud indi pagdayunon ang kaso apang suno sa iya, wala sila diri nagpadala.
