Padayon pa nga nagasaka kada semana ang kahalitan sang El Niño phenomenon sa probinsya sang Negros Occidental.
Sa interview sang Bombo Radyo Bacolod kay Negros Occidental Governor Eugenio Jose “Bong” Lacson, sa karun nagdangat na sa P77 million ang balor sang kahalitan sa agrikultura, kun sa diin yara lamang sa P300 mil ang halin sa maisan kag ang nabilin ang kapierdihan na sa humayan.
Aminado ini nga mayorya sa apektado amo ang mga farmlands nga nagasalig gid lamang sa ulan.
Paathag sang gobernador nga nakaligad palang nga tuig, gina-estoryahan na ang El Niño kag ginapanugyan na sa mga mangunguma nga ipaiway na lamang ang isa ka crop, apang madamo gihapon sang nagrisgo kag nagtanom.
Nagapati si Lacson nga magasaka pa ang numero kag madamo pa sang mahalitan kadungan sa peak sang summer.
Apang positibo gihapon ang gobernador nga makapagwa sang produkto ang mga irrigated farmlands.
Suno diri, dapat mamaximize ang tubig, gani kinanglan man nga matinluan ang mga canal agud nga malayo ang malab-utan sang tubig.
Suno diri, ang Provincial Government ang nagtalana na sang P400,000 nga gamay lamang nga subsidy.
Aminado ini nga kulang ang budget apang luyag lamang nila nga mapabatyag nga ang probinsya ang handa magbulig kutob sa masarangan.
Sa pihak nga bahin, ginalantaw sini nga magahatag man sang financial assistance ang Department of Agriculture, apang ang balor ang mahimo matumod pa matapos nga sila ang makapatigayon sang survey.
