Nagsaka na sa tatlo ang numero sang patay matapos nga nabungguan sang truck ang isa ka tricycle sa Circumferential Road, Barangay Bata, Bacolod City kagab-i.
Una na nga ginpahayag sang driver sang truck nga si Ervie de Pedro nga hinali lang nag-U turn ang tricycle gani nalab-ot ini kag nalapakan ang side car.
Dead on the spot ang nagasakay sa side car nga si Reynold Porras samtang pilason naman ang mag-amay nga sanday Marciano Mahilum kag 17-anyos nga si Luisa.
Suno kay Police Staff Sgt. Richard Dimaala, traffic investigator sang Bacolod Police Station 3, si Marciano Mahilum nga bayaw ni Porras ang gindala sa Corazon Locsin Montelibano Memorial Regional Hospital apang ini ang ginbawian sang kabuhi alas-9:00 kagab-i.
Ang bata naman nga si Luisa Mahilum ang napatay man samtang ginabulong sa Riverside Medical Center alas-8:00 kaina sang aga.
Suno kay Dimaala, pilas sa ulo ang kalabanan nga gin-agom sang tatlo matapos nga nagpilit sa tricycle.
Ang tricycle ang nagikan sa Barangay Villamonte, Bacolod City kag magapauli na kuntani sa Hacienda Pait, Barangay Matab-ang, Talisay City sang natabo ang aksidente.
Samtang ang truck nga ginadala ni de Pedro, 48 anyos, nga naka-unload na sang karga nga tubo ang nagikan sa north kag papauli na sa syudad sang Bago.
