Nagdangat na sa 1, 806,912 ang mga nagrehistro nga mga botante sa probinsya sang Negros Occidental santo sa pinakaulihi nga datos nga ginpagwa sa April 19 Election Registration Board hearing sang Commission on Elections.
Sa interview sang Bombo Radyo Bombo Bacolod kay Negros Occidental Provincial Election Supervisor Atty. Ma. Fatima Aspan, nagnubo ang nagparehistro nga mga botante kun ipaanggid sang 2019 local and national elections nga nagdangat sa 1,889,200.
Bangud sini, may lalagson pa nga 82, 288 ka mga registrants.
Ginpaathag ni Aspan nga nabuhinan ang mga registered voters bangud may ginkakas nga mga botante nga wala na nakaboto sang duha ka sunod-sunod nga election, mga nagtaliwan kag may mga nagtransfer sang registration.
Mahimo man nga mag-apply sa pagreactivate sang registration kun deactivated ang status, tuga sang duha ka eleksyon nga wala makaboto.
Ang mga SK voters nga magaedad na sang 18 anyos antes ang 2022 national and local elections ang eligible na nga makaboto kag indi na kinahanglan nga magparehistro liwat.
Ang mga maparehistro nga magapadalagan bilang kandidato sa paalabuton nga eleksyon ang kinahanglan nga magapuyo sang isa ka tuig sa lugar antes ang eleksyon, ukon nagparehistro ini sang Mayo 8 bangud patigayunon ang eleksyon sa Mayo 9 tuig 2022.
Samtang ang mga magaboto ang kinahanglan nga mangin residente sang lugar sa sulod sang anum ka bulan antes ang eleksyon.
Suno kay Aspan, ang mga pumuluyo nga nagparehistro sa Overseas Absentee Voting ang wala madala sa datos sang local comelec bangud ini ang nagareflect sa Consulate.
Nagpanawagan man ini sa tanan nga magparehistro agud nga mapractice ang right of suffrage kag makaboto sa tuig 2022.
Nagpangabay man ini sa mga maparehistro nga magdala sang face shield, face mask, ballpen kag magsunod sa minimum health protocols.
Suno kay Aspan, bukas ang commelec offices halin alas 08:00 sa aga tubtob alas 05:00 sa hapon bisan holiday.
