Daan nga higut-anon ang ginalantaw nga motibo sa pagtiro sang suspek sa biktima sa shooting incident nga nagluntad sa Purok Narra, Barangay Lopez Jaena, Murcia, Negros Occidental subong nga Domingo, Abril 6.
Isa patay samtang may pila ka mga pilason sa nagluntad nga shooting incident.
Ginkilala kay Edgar Tabunoc Jr., 24 anyos samtang ang suspetsado ang ginkilala kay Arman Lanerez, 47 anyos, kasado, driver kag residente sang nasambit nga lugar.
Sa interview sang Bombo Radyo Bacolod kay Police Captain Honey Labaro, Deputy Chief of Police sang Murcia Municipal Police Station, madasig man nga nadakpan ang suspetsado bangud nagapatigayon ang mga ini sang checkpoint sa highway malapit sa eskwelahan sang may nabaton ang mga ini nga nagapangayo sang police assistance bangud sa nagluntad nga shooting incident.
Suno kay Labaro, nagresponde man sila gilayon sa lugar kag nakita nga may natiruhan na
Suno diri, sa ila imbestigasyon kag santo man sa pagpamangkot may daan na nga tema-tema nga nagresulta sa paglab-otanay kun sa diin may isa nga napatay.
Suno kay Labaro, ginalantaw nga nagsugod ang tanan sa reklamo sang pamilya sang biktima sa Barangay nga ang dalan ang ginbutang sang pamilya sang suspetsado sang mga basura kag ginadabukan.
Sang naglabay ang tricycle nga ginamaneho sang biktima may nagluntad nga komprontasyon kag nagtinapungulay na nga nagresulta sa paggabot sang suspek ang armas-luthang kag gintiro ang biktima nga nagresulta sa kamatayon sini.
Nadakpan man gilayon sa ginpatigayon nga hot pursuit operation ang suspek nga si Arman Lanerez 47 anyos kasado kag driver kag narecover ni diri ang caliber 45 nga may nakainsert nga magazine nga may unod nga pito ka ammunitions.
Gina-imbestigaran pa sa karun sang Murcia Municipal Police Station kun ngaa may yara sang armas-luthang ang suspek nga nagatrabaho bilang driver.
Nakahunong na sa karun si Lanerez sa Murcia Municipal Police Station kag nagpamalibad nga maghatag sang iya pahayag sang gintinguhaan sang Bombo News Team nga kuhaon ang bahin sini nga may kaangtanan sa nagluntad nga shooting incident.
