Hatagan sang pasidungog sanday Olympic gold medalist Carlos Yulo kag tennis star Alex Eala bilang Male kag Female Athletes of the Year sa Annual Awards Night sang Philippine Sportswriters Association (PSA) sa Pebrero 16.
Nagpakita sanday Yulo kag Eala sang athletic excellence sa global stage sang 2025.
Si Yulo, nga PSA Athlete of the Year sang nagligad nga tuig, ang nakakuha sang iya ikatatlo nga gold medal sa World Gymnastics Championships sa Jakarta, Indonesia sang nagligad nga Oktubre matapos nagpangibabaw sa vault finals.
Nakakuha man sia sang bronze medal sa floor exercise.
Sa Asian Championships sa South Korea sang nagligad nga Hunyo, nagdaog man ini sang gold sa floor exercise kag tatlo ka bronze medals sa all-around, vault, kag parallel bars events.
Samtang si Eala naman ang may historic 2025 season.
Sang Marso, nalutos ni Eala ang Grand Slam champions nga sanday Jelena Ostapenko, Madison Keys, kag Iga Swiatek rason nga nakalab-ot siya sa semifinals sang Miami Open kag napyerde sa American nga si Jessica Pegula.
Bangud sini, nakasulod ini sa Women’s Tennis Association (WTA) Top 100 nga naghatag ligwa sa iya Grand Slam main-draw debuts.
