Nagpanawagan ang obispo sang Diocese of Bacolod sa mga katoliko nga magpangamuyo kag magbalik sa Ginoo samtang naka-home quarantine bangud sa coronavirus disease 2019 (COVID-19).
Sa misa nga ginpatigayon Domingo sang aga paagi sa live streaming kag radyo, ginpahayag ni Bishop Patricio Buzon nga bangud wala sang ubra kag klase ang kalabanan subong, ini ang insakto nga tion agud magpamalandong kag mag-istorya sa Ginoo.
Suno kay Father Buzon, kita sa karun ang kaangay nga naputos sa kadudulman bangud sang COVID-19 apang ang Diyos ang kapawa sang kalibutan.
Gani kinahangalan nga magbalik kita sa Ginoo, magpaubos kag magsunod sa Iya.
Nagapati man ang obispo nga indi ang Diyos ang naghimo sang virus kundi binuhatan ini sang mga tawo.
Suno sa iya, wala ang tawo nangin maayo nga tulugyanan sang kalibutan bangud sa pagpang-abusar sini.
Gindugang man sini nga nagapakita lang ang natabo nga kun magpaka-Diyos ang tawo, amu ini nga klase sang kalibutan ang madangatan bangud wala gid may mahimo ang tawo kun wala ang Ginoo.
Apisar sini, suno kay Father Buzon, ang pagpalangga kag kaluoy sang Ginoo ang wala nagakadula gani gin-engganyo sini ang mga tagpalamati nga itugyan sa Diyos ang ila kaugalingon, pamilya kag bilog nga pungsod bangud luwas ang tanan sa Iya mga kamot.
