Nawasak ang nawala nga kamot sang 18-anyos nga babayi matapos nagbunggo ang overloaded nga tricycle sa modernized jeepney sa Purok Kasilingan, Barangay Mansilingan, Bacolod City, Lunes sang hapon, Hunyo 19.
Suno kay Police Captain Andy Ofalia, station commander sang Bacolod Police Station 7, padulong sa Barangay Felisa ang tricycle nga ginamaneho ni Francisco Mumfil III, 29-anyos kag residente sang Barangay Felisa, Bacolod City samtang padulong naman south to north ang modernized jeepney nga may ruta Mansilingan-Felisa kag ginamaneho ni Romeo Perolina, 55-anyos, residente sang Barangay Plaridel, Sagay City.
Bangud nga walo ka bilog ang pasahero sang tricycle, nagtuwas ang tricycle kag wala nakontrol ni Mumfil ang pagmaneho rason kun ngaa nagliko ini pawala kag nagbunggo sa modernized jeepney nga nagasugata.
Bangud sa makusog nga impact, nagkaladagdag ang mga pasahero sang tricycle kag naipit ang kamot ni Erica Losande, 18-anyos, residente sang Sagay City.
Gilayon ini nga gindala sa ospital para sa nagakaigo nga pagbulong.
Wala naman sang may nasamaran sa mga pasahero sang modernized jeepney.
