Masobra sa P12 million nga balor sang assorted brand sang smuggled cigarettes nga narecover sang Maritime Group sang Philippine National Police kag Bureau of Customs (BOC) VI sa Sitio Bagambang, Brgy Tiling, banwa sang Cauayan, Negros Occidental kahapon, Mayo 19.
Sa interview sang Bombo Radyo Bacolod kay Police Captain Reynaldo Bauden, station commander sang Bacolod City Maritime Police Station, nagpatigayon sila sang anti-smuggling operation kasunod sang impormasyon nga nakuha sang Himamaylan City Maritime Enforcement Unit matapos makabaton sang impormasyon angot sa pagtransport sang illcit cigarettes sa baybayon sang Sitio Bagambang, Barangay Tiling, Cauayan, Negros Occidental.
Natigayon nga madakpan sanday Bensar Sabtal, 39 anyos kasado kag residente sang Santa Barbara, Zamboanga City kag Wilmar Liper, 39 anyos single kag residente sang Sitio Wayang, Barangay 3, Himamaylan City, Negros Occidental
Narecover sa mga ini 4300 reams sang Dunston brand sang sigarilyo nga may market value nga 4,816,000; 800 reams sang Fort Brand nga sigarilyo nga may market value nga 2,623,000 kag 4000 reams sang Casablanca brand sang sigarilyo nga may market value P4,480,000.
Suno kay Bauden, ang duha ang nakahunong na sa custodial facility sang Bacolod City Maritime Police Station kag magapangatubang sang kaso nga paglapas sa RA 10863 ukon Customs Modernization and Tariff Act.
