Nagpanindugan ang isa ka nakabaton sang P5,000 nga ayuda sa banwa sang Valladolid, Negros Occidental nga wala sini ginbalik ang P3,000 gikan sa nabaton bangud wala man nakabutang sa papel nga iya napirmahan nga kinahanglan ini nga ibalik.
Ini matapos sang mga reports nga ginabawi sang opisyales sang ciudad ang P3,000 gikan sa P5,000 nga ayuda halin sa Department of Social Welfare and Development (DSWD).
Sa interview sang Bombo Radyo Bacolod kay Jelyn Villama, wala siya nagpasugot nga ibalik ang P3,000 bangud nga antes paman nagbaton sang ayuda, ginkumpirmar na sini sa personnel sang DSWD kun bilog nga P5,000 ang makuha.
Suno kay Villama may naghambal sa iya nga ibalik ang P3,000 apang wala ini nagpasugot bangud indi man personnel sang DSWD ang nagpabalik.
Ginkadtuan pagid ini ni Nenet Armas, nga ginapahayag coordinator, apang wala na sini gin-atubang, kun sa diin siya ang ginginhambalan pa nga indi na sa masunod malakip sa ayuda.
Dugang pa sini nga wala man ini personal nga nagpalista sa ayuda, sa baylo ang nagvalidate ang naglista sang iya pangalan.
Samtang wala naman sang nahimo ang isa sa nakabaton sang ayuda bangud gin-uli na sini ang P3,000 gikan sa P5,000 nga ila nga nabaton.
Suno kay Corazon Villaseñor, gin-uli niya ang P3,000 bangud ini man ang ginhambal sa iya.
Aminado man ini nga dako pa kuntani ang mabulig sang nasambit nga kantidad para ibakal sang iya nga bulong.
