Magahatag sang P50,000 nga padya ang alkalde sang San Manuel, Isabela sa mahimo nga makatudlo ukon makahatag sang impormasyon sa posible nga suspek sa pagpatay kay Miss Philippines-Earth 2013 runner-up Lullete Jane Ramilo-de Guzman.
Madumduman nga ginluthang si De Guzman samtang yara sa sulod sang iya salakyan sa atubang sang iya balay sa San Manuel, Isabela sang Biyernes, Pebrero 13.
Gilayon naman nga nagpalagyo ang mga suspetsado padulong sa National Highway, sang Brgy. Distrito 3, San Manuel, Isabela.
Suno kay Mayor Faustino “Dondon” Dy IV, ang bisan sin-o nga may nahibaluan parte sa suspek ang mahimo magpalapit sa iya ukon sa kapulisan.
Nagpalab-ot naman ang alkalde sang iya pakig-unong sa pamilya sang bikitma.
Nahibaluan nga nangin runner-up si De Guzman sa 2013 Miss Philippines-Earth kag nakabaton sang pila ka special awards antes nagpadayon sa iya career bilang manunudlo matapos magtapos sa University of Perpetual Help System-Isabela campus.
