CANADA – Tuman ang katugnaw nga mabatyagan sa pungsod Canada nga sa karun yara sa negative 4 degree celsius ang temperatura.
Sa interview sang Bombo Rayo kay Bombo International Corespondent Ferdinand Galila, tuman ang katugnaw nga mabatyagan sa Canada nga indi sini masarangan magtinir sa gwa sang balay.
Aminado man ini nga kun matapos ang holidays, dako ang ila ginabayad sa kuryente bangud kinahanglan nila sang init gikan sa heater kag fireplace kontra sa katugnaw sang tiyempo.
Masami man nga apektado ang plumbing system didto kun sa diin nagakaguba ukon naga-crack ang mga tubo bangod sa manubo nga temperatura gani kinahanglan gid nga gamiton ang heating system sang balay.
Sa adlaw naman sang Christmas, indi madula sa handaan nila ang lechon, turkey, bihon, spaghetti, barbecue kag mga prutas ilabi na sa mga Pinoy bangud ginasamo sang mga ini ang Canadian kag Filipino culture.
Suno diri, kun masami nga makit-an ang turkey sa lemasa didto sa Canada, lechon naman ang sa Pilipinas.
Ang lechon sa Canada ang may gamay nga kinalain kun ikumparar sa Pilipinas, apang kun Pilipino ang naghanda kag nagluto, Pilipino style gid ang lechon.
Isa pa sa ginahulat sang kadam-an didto amo ang katapusan sang holidays nga madamo sang mga stores nga nagahatag sang dalagko nga discount.
