“Very good signal” para sa business sector ang pagbalik sa normal sang status sang Senado.
Sa interview sang Bombo Radyo Bacolod kay Metro Bacolod Chamber of Commerce and Industry (MBCCI) Chief Executive Officer Frank Carbon, maayo nga signal para sa commerce industry ang pagbalik sa normal sang Senado kun sa diin may-ara na sang liderato kag mga komitiba.
Pahayag sini nga magabalik na ang liwat nga pagsalig sang mga foreign investors nga nagkahangawa sang nakaligad nga mag-invest bangod sa indi estable nga political system.
Nagalaom si Carbon nga natapos na ang political issue, kag karun mas tutukan naman ang mas importante nga mga economic problems.
Kalakip na diri ang mataas nga inflation rate, mahal nga presyo sang gatong, energy crisis, kag mahal nga mga balaklon.
Nagalaom man si Carbon nga amat-amat naman nga magapanaog ang presyo sang gatong sa masunod nga mga binulan.
Ini ang indi naman gilayon mabatyagan bangod ginabyahe pa sa kadagatan ang mga krudo.
Suno kay Carbon, dako man ang konsumo sang mga power industry sang gatong, gani kun magnubo na ang presyo, mahimo magpanaog man ang generation charge sa ginabayaran nga kuryente.
Sa pihak nga bahin, wala naman sang kahangawa ang business sector sa impeachment trial ni Vice President Sara Duterte.
Suno kay Carbon, wala man sang mangin epekto sa mga negosyo ukon sa ekonomiya hinali ma-impeach ang Bise Presidente.
