Preparado na ang seguridad sang 28th Panaad sa Negros Festival para sa patigayunon nga kahiwatan sa masunod nga semana.
Sang Abril 13 sang aga, ginpatigayon ang Send-off Ceremony sang Task Force Group Panaad Festival sa pagpanguna ni Negros Occidental Governor Eugenio Jose “Bong” Lacson kag sang Negros Occidental Police Provincial Office (NOCPPO) para sa selebrasyon nga maga-umpisa sa Abril 15 tubtob 21.
Sa iya speech, ginpahayag ni Lacson nga subong nga tuig, nagpreparar ang provincial government sang mas madamo nga aktibidad para sa mas masangkad nga selebrasyon.
Suno sa gobernador nga bangud sini, ginalantaw ang mas madamo nga pagdagsa sang tawo nga posible magadangat sa pila ka libo nga mga Negrense kag mga turista.
Ang send-off ceremony ginpatigayon sa Camp Alfredo Montelibano Sr., ciudad sang Bacolod.
Ginbug-usan sang 1102 ka men kag women in uniform sa send off kahapon para sa seguridad sang 28th Panaad sa Negros Festival.
