Naalarma na ang isa ka labor group sa pagdamo sang mga Chinese workers diri sa Pilipinas.
Kahapon, ginpagwa sang gobyerno ang datos nga P22 bilyones nga income taxes ang wala nakolekta nagikan sa mga foreign workers nga nagatrabaho sa Philippine Offshore Gaming Operations ukon POGO.
Santo sa figure, 56, 000 ang mga Chinese workers nga employed sa POGO.
Magluwas diri, may mga Chinese man nga nagatrabaho sa construction sites sa pungsod.
Sa interview sang Bombo Radyo Bacolod kay Associated Labor Unions-Trade Union Congress of the Philippines (ALU-TUCP) spokesperson Alan Tanjusay, ginkumpirmar sini nga nakakuha sila sang video kun sa diin makit-an ang mga foreigners nga nagahimo sang manual labor kaangay sang pagmikskla sang semento kag paghakwat sang mga construction materials.
Suno kay Tanjusay, nadulaan sang trabaho ang mga Pilipino sa iya dutang-natawhan bangud may kakulangan ang mga ahensya sang gobyerno sa pagpatuman sang kasuguan kaangay sang pagkuha sang isa ka foreign worker sang alien employment permit.
Sadto, wala gina-require sang tax identification number ang mga foreign workers kun mag-apply para sa permit.
Para kay Tanjusay, wala ginahimo ni Labor Secretary Silvestre Bello ang iya trabaho rason nga napahanugutan ang pagsulod sang mga foreign workers bisan wala nagasunod sa pagsulundan.
