Pagdugang sang grade level sa senior high school, “fake news” suno sa DepEd

Gintawag sang Department of Education nga “fake news” ang post sa social media nga nagapalapta nga makaangkon sang dugang nga grade level sa senior high school.

Sang Domingo, gintumod sang DepEd ang Facebook post nga may publication material nga nakabutang nga may Grade 13 sa School Year 2025-2026.

Sa karun, Grade 11 kag Grade 12 lang ang may yara sa basic education sang pungsod sa senior high school.

Paandam sang DepEd, dapat maghalong kag mangin vigilant batok sa misinformation.

Dugang pa sini nga para sa opisyal nga mga anunsyo kag impormasyon natuhoy sa basic education, bisitahon lamang ang official DepEd Philippines social media accounts.

Magasugod na sa Hunyo 16, 2025 ang academic year 2025-2026.