Nagbubo ang emosyon sa vigils sa massacre sites kag rallies nga nagapanawagan sa kahilwayan sang mga hostages sa Gaza kadungan sang pagkomemorar sang una nga anibersaryo sang makamamatay nga pagpang-atake sang Hamas sa Israel sang Oktubre 7 nga nagkuha sang kabuhi sang 1,205 ka mga persona.
Ginsuguran ni President Isaac Herzog ang adlaw paagi sa isa ka moment of silence alas 6:29 sang aga, impunto nga oras nga kun sa diin nagsugod ang pagpang-atake sa Kibbutz Reim, ang site sang Nova music festival kun sa diin indi magnubo 370 ka mga persona ang nagkalamatay.
Ang pamilya sang mga nagkalamatay ang nagtambong sa memorial nga nagahinibi.
Sa ciudad sang Tel Aviv, nagrally naman ang pamilya sang mga hostages kag supporters bilang pagpanawagan nga makapauli na ang ila mga pinalangga sa kabuhi nga yara sa gihapon sa luyo sang Hamas militants.
Kadungan sang anibersaryo, nagapadayon sa gihapon ang pag-ilinaway sa Gaza kag nagalala ang tensyon sa Lebanon.
