Isa ang napatay samtang isa naman ang pilason sa aksidente nga nagluntad sa National Highway, Purok Masulhay, Barangay Ma-ao, Bago City sang Sabado sang gab-i, April 12.
Ang imbulbado sa aksidente amo ang Fuso Stake Truck kag isa ka Suzuki Carry Pick-Up.
Sa interview sang Bombo Radyo Bacolod kay Police Staff Sergeant Ronald Javier, traffic investigator sang Bago City Police Station, ang truck nga ginamaneho ni Janel Dequiña, 25 anyos, residente sang Hda. Dinapalan, Brgy. Maao, ciudad sang Bago samtang ang Suzuki Carry Pick-Up nga ginamaneho ni Edmundo Padasas Jr., 42 anyos kag residente sang Purok 4, Barangay Singcang Airport kag ang pasahero amo si Ramie De Guzman, 43 anyos, residente sang Purok Katilingban, Barangay 29, ciudad sang Bacolod.
Suno kay Javier ang truck nga ginamaneho ni Dequiña ang nagdulog sa higad sang dalan sa National Highway sa Purok Masulhay agud magbakal kuntani sang pagkaon apang antes pa man makapanaog si Dequiña, nakabunggo ang salakyan sa buli sang truck.
Ginhingagaw dala sa Bago City Hospital ang duha nga sakay sa salakyan apang si De Guzman ang gindeklarar nga dead on arrival samtang si Pasadas naman ang ginsaylo sa Doctors Hospital sa ciudad sang Bacolod para sa dugang nga pagbulong kun sa diin estable naman ang kondisyon sini.
Mahimo nga wala matalupangdan sang salakyan ang nagadulog nga trucking bangud madulom ang area gani nabungguan niya ini.
