252, 633 ka mga residente sang ciudad sang Bacolod ang nakabaton sang tag-duha ka kilo nga bugas nga ginpanagtag sang city government sang Bacolod kasunod sang halit sang baha sang tinalikdan nga semana.
350,000 kuntani ka mga pumuluyo nga nagaedad sang 18 anyos pasaka ang target nga mahatagan sang tag-duha ka kilo nga bugas.
Suno kay Bacolod City Mayor Alfredo Benitez, target nga mahatagan ang tanan nga registered residents kag sa karon, 252, 633 packs na sang tag-duha ka kilo ka bugas ang nadistribute.
Ini ang masobra 50 porsyento na sang target nga hatagan.
14,000 ka sako sang bugas ang ginbakal sang city government agud ipanagtag sa 350,000 ka mga registered voters.
Suno sa alkalde, igaconvene niya ang committee para sa rice distribution agud nga makakuha sang data bangud may mga lugar nga kinahanglan butangan sang dugang nga distribution centers kaangay sang Arao Relocation Site sa Barangay Vista Alegre bangud layo ini sa barangay hall.
Suno kay Benitez, mas maayo kun may special distribution center sa relocation site.
Kun madamo pa gid ang wala nakabaton, magadistribute liwas sa Sabado kag Domingo apang kun diutay nalang, mahimo nga igadul-ong nalang ini sa ila nga balay.
Original nga duha ka valid IDs ang ginpakita sang registered voter agud nga makabaton sang bugas.
Suno kay Benitez, masterlist nagikan sa Comelec ang ginbasehan bangud cleansed list ini kag validated.
Magapadayon naman ang paghatag tubtub nga makabaton ang tanan nga maiguan sang tag-duha ka kilo nga bugas.
