Nagpanawagan ang Bacolod Traffic Authority Office (BTAO) nga ma-extend sang duha ka semana tubtob isa ka bulan antes ipatuman ang pagpanakop sang mga e-bike kag e-trike nga indi rehistrado karun nga wala pa nafinalize ang regulasyon.
Sa interview sang Bombo Radyo Bacolod kay BTAO Head Patrick Leonard Lacson, sa karun ginatrabaho pa sang technical committee kag sang Sangguniang Panlungsod ang paghimo sang regulation.
Madumduman nga naghatag ang isa ka bulan nga grace period si Bacolod City Mayor Alfredo “Albee” Benitez antes magpatuman sang pagpanakop, apang ini ang magatakop na sa Mayo 24.
Apang apisar nga pila ka adlaw nalang ang nabilin, wala pa nafinalize ang regulasyon, gani nagakahangawa si Lacson nga makaangkon sang problema kun sila ang magasugod na sa apprehension.
Paathag sini nga ang BTAO ang nagahatag lamang sang mga suhestyon kag ang Sangguniang Panlungsod gihapon ang magahimo sang ordinansa, samtang sila ang taga-implementar lamang.
Apisar sini, nagalaom man si Lacson nga mapadasig sang konseho ang pagpagwa sang regulasyon bangod luyag man nila nga makadungan ang pagpatuman sang Bacolod City sa nationwide nga pagpatuman.
Sa pihak sini, gin-athag sang BTAO Head nga nagpahayag ang Department of the Interior and Local Government (DILG) nga sarang makahimo sang ordinansa ang local government unit tuhoy sa pagpatuman depende sa sitwasyon.
