BACOLOD CITY — Magapangita sang maayo nga abugado ang pamilya sang singer nga si Noven Belleza nga amo ang magadepensa sa iya sa ginaatubang nga kaso nga rape sa ciudad sang Cebu.
Sa exclusive interview sang Bombo Radyo sa pamilya ni Noven sa Hacienda Salome Dos, Barangay 10, Victorias City, ginpahayag sang amay sini nga si Reynaldo nga wala nahimo sang iya anak ang alegasyon sang 19 anyos nga babayi nga nagpasaka sang panumbungon.
Suno sa iya, wala naga-isahanon ang iya anak sa condominium unit nga iya gintiniran bangud yara ang iya manager kag may mga gwardiya man ang building.
Kadungan sini, nagpanawagan ang amay nga Belleza sa mga fans sang newbie singer nga indi anay paghusgaran ang iya anak bangud kilala man nila ini halin sang nagasugod pa lamang ang anay karga-tapas sa reality singing competition nga iya gindag-an.
Suno kay Reynaldo, kilala niya ang rekord sang iya anak amo gani nga mahulat anay ang iya mga fans sang kumpirmasyon kun ano gid ang matuod nga natabo bangud alegasyon pa lamang ang ginaatubang sini subong.
Nahibaluan nga ginpauntat na ni Noven ang iya amay sa pagtrabaho sa kampo sang tubo humalin sang nagdaog ini sang dos milyones pesos nga cash kag house and lot.
Samtang, wala pa gid naka-contact sa pamilya Belleza sa Hacienda Salome Dos, Barangay 10, Victorias City ang manager sang newbie singer nga si Noven kasunod sang pagpangatubang sini sang kaso nga rape nga ginpasaka sang 19-anyos nga babayi sa Cebu City.
Sa interview sang Bombo Radyo sa iloy ni Noven nga si Rosie Belleza, ginpahayag sini nga duha ang manager ni Noven nga ginalakipan sang babayi kag lalaki nga naga-apelyido Lopez apang wala pa gid nakapakig-angot ang mga ini sa ila humalin sang Lunes.
Ginahulat nila sa karun ang abiso sang kamagulangan nga anak kun magakadto sila sa Cebu apang sa sini nga mga tinion, indi macontact ang mobile number ni Noven.
Samtang, kumpyansa ang bilog nga pamilya ni Noven nga wala niya ginhimo ang pagpanghimulos.
Suno sa tiyo sini nga si Victor Belleza, utod ni Reynaldo, nagdako sa uma si Noven kag inosente ini sa kaangay nga mga akusasyon.
Kalakip man si Victor sa mga wala nakatulog sang tinalikdan nga gab-i matapos nga nahibaluan ang amo nga balita.
Ang iya hinablos suno kay Victor ang pobre lang sang una nga karga-tapas kag wala nagbag-o ang paminatasan sini humalin sang siya ang nagdaog sa reality singing contest.
