BACOLOD CITY — Indi matupungan ang kalipay sang mga ginikanan sang singer nga si Noven Belleza matapos nga nag-isol sa pagpasaka sang kaso ang babayi nga ginpasuni biktima sini sang pagpanglugos sa Cebu sadtong Hulyo.
Ginsugata sang malapad nga yuhom sang mag-asawa nga Reynaldo kag Rosie Belleza ang team sang Bombo Radyo nga personal nagpadulong sa ila puluy-an sa Hacienda Salome Dos, Barangay 10, ciudad sang Victorias.
Suno kay Tatay Reynaldo, kahapon sang hapon nagtawag sa ila si Noven kag nagpahayag nga wala na sila sang dapat kabalak-an bangud indi na magpasaka sang kaso ang natungdan nga babayi sa Cebu.
Ginpabutyag sini nga tuman nga naapektuhan sang amo nga eskandalo ang karera sang ila anak bangud nangin limitado ang guesting sini rason nga amat-amat man nga naggamay ang iya ginapadala sa ila sa Negros.
Apang kahapon, nagakanta na si Noven samtang nagaistorya sa ila sa telepono kag nahimo naman sini nga maka-relax kag makalagaw-lagaw, nga sadto indi niya mahimo bangud nagalikaw nga ma-interview.
Ginakabig sang amay nga Belleza ang amo nga eskandalo nga isa ka pagtilaw sa karera ni Noven kag subong man sa ila nga pamilya kag subong nga nahilway na sa kaso ang singer, daku ang pasalamat sini sa Guinoo.
