Padayon nga nagakahangawa ang pamilya ni Pearl Joy Galve sa ila nga safety samtang nagapadayon ang imbestigasyon.
Sa interview sang Bombo Radyo sa pakaisa ni Pearl Joy, ginkakibot sini sang makita ang nakasachet nga puti nga powder sa sulod sang cabinet.
Suno diri, nakita sini ang sulodlan sang sigarilyo nga natongtong sa mga bayo kag sa pagbukas sini didto na niya nakita ang mga sachet sang puti nga powder nga una ginpatihan nga shabu apang negatibo ang resulta sa Negros Occidental Crime Laboratory Unit.
Suno diri, madugay na nga nagapanugid sa iya si Pearl Joy nga may nagakakit-an ini nga mga sachet sang puti nga powder sa ila nga balay.
Ila man sa karun ginapatihan nga ini ang ginapanag-iyahan sang stepfather nga si Rene John Nasis.
Samtang, padayon man ang ila kahangawa sa safety sang ila pamilya ilabi na nga naghatag na sang statement ang iloy ni Pearl Joy nga si Jennifer.
Pahayag sini, nakaligad lamang nga may nakita ini nga lalaki nga nagasuksok sang puti nga kalo nga nagasunod ang panulok sa iya.
Apang, sang nakita sini nga naghana ang lalaki nga magtabok, gilayon naman ini nga nagdalagan pauli.
