Nagpalapit ang pamilya ni Ronelo Panuncial, ang suspek nga nagtiro-patay kay Police Master Sergeant Romulo Galvez sa talapatan sang Commission on Human Rights (CHR) agud mamangkot kun ano ang serbisyo nga mahatag sa ila.
Madumduman nga nagtaliwan man si Panuncial sang Abril 12 samtang ginabulong sa ospital.
Sa interview sang Bombo Radyo kay Vincent Parra, Head sang CHR NEGROS, nanghingyo ang iloy ni Panuncial na magpatigayon sang patas nga imbestigasyon bangud luyag gid sini mahibaluan kun ano ang gintuaan sang kamatayon sang iya bata.
Suno kay Parra, kinahanglan sang matul-id nga imbestigasyon bangud indi mahapos kun ma-conclude dayon bangud ang suspek kag biktima ang pareho nga napatay.
Pahayag sini nga yara pa sila subongg sa validation stage kun sa diin indi pa kompleto ang mga dokumento kag testimonies.
Dugang pa nagapakig-angot man sila sa Bacolod City Police Office kag sa pamilya ni Police Master Sergeant Romulo Galvez. Samtang
ginpanginwala sang Bacolod City Police Office ang mga alegasyon sang pamilya ni Ronelo Panuncial nga ginkuga ukon ginkastigo rason nga ini ang napatay.
Sa interview sang Bombo Radyo kay Police Col. Eugene Rebadomia, City Director sang BCPO, nagapati ini nga ang alegasyon sang iloy sang suspect nga ginkastigo kag ginkuga ang iya bata ang wala natabo.
Bangud suno kay Rebadomia, makita man sa mga CCTV footage nga gilayon nila nga gindala sa ospital ang suspek matapos ang krimen.
Dugang pa sini, ang samad nga naangkon ni Panuncial ang nakuha niya sang ini ang nagbato kay Police Master Sergeant Romulo Galvez.
Pahayag sini nga bukas sila sa bisan ano nga imbestigasyon agud mahibaluan nga wala sang kahilabtanan ang kapulisan sa pagkamatay ni Panuncial.
