Desidido nga magpasaka sang kaso ang pamilya sang tatlo ka pulis nga ginluthang patay sang isa man ka pulis sa Sibulan, Negros Oriental.
Ang suspect ang ginkilala nga si Police Staff Sgt Bonifacio Saycon, nga una nga nagpaniro sa SAB Resto Bar kag nakapatay sa sibilyan nga si Chiela Mae Dinawanao kag sunod nga ginluthang ni Saycon ang kaupod sini nga sanday Police Captain Jose Edrohil Cimafranca, hepe sang Sibulan Municipal Police Station; Police Senior Master Sgt Tristan Chua kag Patrolman Rey Albert Temblor samtang yara sa sulod sang salakyan.
Sa interview sang Bombo Radyo kay Police Corporal Michael Angelo Chua, manghod ni Police Senior Master Sgt Tristan Chua, nakibot lamang ini sang nabatian sa ila nga radyo nga involved ang iya magulang sa shooting incident.
Suno diri, naga-duty ini sa warrant section sang Dumaguete City Police Station sang ginhambalan siya nga ginluthang ang iya magulang kag gilayon ini nga nagbyahe padulong sa Sibulan.
Na-abtan na lamang sini nga wala na sang kabuhi ang iya utod kaupod ang duha ka pulis.
Nakita sini nga may duha ka igo sang pagpangluthang sa ulo ang iya magulang.
Samtang, nahibaloan naman nga ang suspek nga si Saycon sang Disyembre lamang nag-abot sa Sibulan kag ulihi na nga nag-upod upod sa tatlo ka pulis.
Si Saycon na-assign sa idalom ni Police Senior Master Sgt Tristan Chua sa intelligence unit.
Pahayag ni Chua, pataposon anay nila ang pagpalubong sa iya magulang kag amo na nga magafocus sila sa pagpasaka sang kaso batok kay Saycon.
