Gin-athag ni Alliance of Concerned Teacher’s Partylist Representative Francisca ‘France’ Castro nga indi matawag silent protest ang ila pagsuksok sang Filipiniana nga nagasimbolo sang magagmay nga sektor sa patigayunon nga State of the Nation Address (SONA) ni President Ferdinand ‘Bongbong’ Marcos Jr.
Ini kasunod sang nagagwa nga balita sa posibilidad nga indi pasudlon sanday Castro kag Gabriela Partylist Representative Arlene Brosas sa House of Representative kun sa diin patigayunon ang SONA.
Sa interview sang Bombo Radyo Bacolod kay Castro, gin-athag sini nga ang panapton ang makabig artistic way bilang panawagan nga madumduman ang mga pigado sa ikatatlo nga SONA, kag ini ang indi man makabig nga bayolasyon sang pagsulundan sa House of Representative.
Paathag sini nga wala man sang may nakapagkit nga protest statement sa ila suksukon nga Filipiniana, wala man sang pagpang-insulto kag sila ang indi man magtuga sang gamo.
Suno diri, halos mga manggaranon lang ang makasulod sa House of Representative, gani bilang representante sang mga magagmay nga sektor, dal-on nila ang panawagan sang mga pumuluyo kaangay sang singgitan sa pagpasaka sang sweldo kag pag-agunto sa kapigaduhon.
Aminado si Castro nga sila ang maga-upod gid man sa protest rally nga patigayunon sa gwa sang Batasang Pambansa apang indi nila ini himuon sa sulod.
Sa pagtuon, nakita nga 70 porsyento sang mga Pilipino ang isa ukon duha ka beses na lamang makakaon sa isa ka adlaw.
Ang ila panapton ang sponsored man sang ila constituent, nga magapakita sang kinalain kun ipaanggid sa mga magatambong nga sa masami nagapa-indis indis sa malahalon nga mga panapton.
