Opisyal na nga nagtakop kaina sang kaagahon ang 2024 Paris Olympics matapos nga nakuha sang Estados Unidos ang final gold medal sa kompetisyon, courtesy sa ila nga women’s basketball team.
Ang nasambit nga gold madal ang nangin lyabi agud magpangibabaw ang USA nga may 40 gold medals, 44 silver kag 42 bronze medals ukon kabug-usan nga 126 medals.
Nagpangaduha ang People’s Republic of China nga may 40 golds, 27 silver kag 24 bronze medals kag nagpangatlo ang Japan nga may 20 golds, 12 silvers kag 13 bronze medals.
Ang Pilipinas naman ang nakaangkon sang best ever medal haul sa Olympics nga may duha ka bulawan, courtesy ni Pinoy gymnast Carlos Yulo kag duha ka bronze medals kun sa diin tie ang Pilipinas kag Hong Kong kag China sa ika-37 nga pwesto.
Sa parada sang mga pungsod pasulod sa stadium, ang flagbearers sang Pilipinas amo sanday Caloy Yulo kag Aira Villegas.
Antes natapos ang closing ceremony, ang Olympic anthem ang ginpatukar kag ginpapanaog naman ang Olympic flag bilang preparation para sa handover sa masunod nga host nga amo ang Los Angeles sa Estados Unidos.
Si Karen Bass, mayor sang LA, ang nagtambong sa kahiwatan agud nga batunon ang flag nagikan kay International Olympic Committee president Thomas Bach.
KAHAPON, nadepensahan sang Team USA ang korona sa men’s basketball sa Olympics matapos nakuha sini ang gold medal sa Paris matapos nga malutos ang France sa finals sa score nga 98-87.
Ini na ang ikalima nga asod asod nga Olympic title para sa men’s basketball team sang US kag ika-17 sa bug-os nga Olympic history sang pungsod.
Nagpanguna si Stephen Curry sa team nga may 24 points kag 5 assists; may 14 points, 9 assists kag 6 rebounds si LeBron James; samtang may 15 points, 4 rebounds, kag 4 assists si Kevin Durant.
Ini ang rematch sang duha ka pungsod sa natabo sa Tokyo 2020 kun sa diin nakuha man sang US ang Olympic title sang ginlutos sini ang France, 87-82, sa final match.
Ginapahayag nga mahimo nga ulihi na ini nga paghampang sa Summer Games sang basketball legends nga sanday James kag Durant bangud sa ila nga mga edad.
Ini man ang ikaapat nga Olympic gold ni Durant, ikatatlo ni James, kag una naman nga gold medal ni Stephen Curry sa Summer Games apisar nga ini ang four-time NBA champion si Steph bangud ini man ang una sini nga Olympic appearance.
Nakuha naman sang Serbia ang bronze medal matapos ang 93-83 victory batok sa World Cup champions nga Germany.
Ang three-time NBA Most Valuable Player nga si Nikola Jokic ang naghimo sang triple double nga 19 points, 12 rebounds kag 11 assists para pangunahan ang pungsod.
Antes ang bronze medal match, ginlutos sila sang US sa semis, 95-91.
